*Wat Sou Jy Doen/What Whould You Do
Ook bekend as: vra namens ‘n vriend/asking for a friend
Synde dat ons soveel belese en berese bloggers in die omtrek het, het menz gedink dat dit goed sou wees om verskillende menings oor situasies en optredes te kan hoor. Hoe mense sou opgetree het in soortgelyke situasies – dieselfde or anders? Sou julle ander opsies raak gesien het en tot ander gevolgtrekkings gekom het?
Alle opinies of gevolgtrekkings is welkom.
- Genoemde vriend maak wend ‘n poging aan om na werk by ‘n ander vriend ‘n draai te gaan maak voordat die vertrek op ‘n oorsese reis. Vriend vat padkos vir die vlug saam in die vorm van geliefkoosde lekkergoed en tjoklits – vriende ken mos mekaar en weet waarvan mekaar hou. Tydens die besoek is daar ‘n ander vriend teenwoordig wat die lewende wit waks uit die besoekende vriend irriteer, maar almal word siviel hanteer en daar word koffie gedrink. Die besoekte en die ander vriend praat soveel in hulle moedertaal, dat die besoekende vriend uitgesluit en minderwaardig voel. Besoekende vriend knip toe die kuier kort en gaan huis toe.
Die opsies soos menz dit aan vraende vriend sou stel, is die volgende:
- Die oomblik toe jy ongemaklik begin voel het, moes jy vra vir ‘n vertaling sodat jy ook kon verstaan wat gesê word.
- Die oomblik toe jy ongemaklik begin voel het, moes jy jouself verskoon het en die geselskap verlaat het.
- Die oomblik toe jy ongemaklik begin voel het, moes jy aan hulle verduidelik het dat jy hulle gedrag/optrede nie waardeer nie en dat dit ongeskik is om lede van die geselskap op so ‘n manier uit te sluit.
- Jy moes besef het dat jy nie eintlik welkom was nie.
Wat dink jy?
Poerdez
PS: nee, niemand het vinger gewys nie, menz wou net hoor wat ander mense in so ‘n situasie sou doen
PPS: ja, menz is ‘n swak en slegte menz, menz hou nie van konfrontasie met menz se naastes nie … menz het nie hierdie skoene voor ‘n ander mens neer gegooi nie.
vuurklip said:
#5: Soos #4 maar loop dadelik en vat die goodies saam.
Maar vuurklip is so asosiaal dat hy nie in so ‘n situasie sal beland nie … 🙂
LikeLiked by 2 people
Net Ek said:
Ek het nie die guts (lees selfvertroue) vir 1 en 3 nie. As ek vriende is met iemand sou ek dink 4 is nie werklik ter sprake nie?
So ek sou maar nr 2 gekies het en geloop het. MET my tjokkies en sweeties. En dit in stilte verorber terwyl ek my wrokkie koester, want dis wat ek doen omdat ek nie my mond kan oopmaak nie.
En ek sou die person ook maar net ‘n koue skouer gee.
Simpel nê?
LikeLiked by 2 people
woordnoot said:
In sulke situasies raak ek vreeslik moedswillig. Ek sou nommer 1 gedoen het met. Net uit moedswilligheid sal ek met die vriend in afrikaans praat. Maar ek sou die kuier kortgeknip het . Ongelukkig sou die geskenke agter moet bly want tipies ek sou dit met die intrapslag al oorhandig geword. As dit n baie goeie vriend is sal ek dit agtery sit. Minder goed?? Die vriendskap sal stadig sneuwel.
LikeLiked by 1 person
lekkervurig said:
Lekkervurig is al lankal ‘n kluisenaar en hou by klein kringetjies – so as iemand in die kring so ongeskik met my maak sou al vier stappe vinnig op mekaargevolg het en ek sou die padkos teruggevat het. Kringetjie nog kleiner. Amen
LikeLiked by 1 person
Nena Dreyer said:
Ek verstaan kommunikasie is amper 90% nie verbaal – mens moet seker elke situasie “lees” op sy eie meriete. Alles in ag genome sou ek eerder geneig wees om die pad te vat.
LikeLiked by 1 person
Positief said:
Ek is voortvarend genoeg om #1 te doen. Heel moontlik met iets soos “Joh, praat julle nou van MY in tale wat ek nie verstaan nie? Praat Afrikaans / Engels, dan praat ek saam ha-ha” (lees so geforseerde laggie op die einde)
LikeLiked by 2 people
travel460 said:
Defnitief nr 2. Ek sou gery het en die insident net daar uit my kop gesit het.
LikeLiked by 1 person
Afrika roos said:
5. Sou myself eers vir paar minute besig hou op my selfoon…en dan die pad vat sonder die groceries.
LikeLiked by 1 person
HesterLeyNel said:
Ek sou soos in #4 gedink het ek is nie welkom nie, myself vriendelik verskoon het, die besoekte vriend in stilte ‘n helse sooibrand toegewens het en hom net daar uit my vriendekring geplaas het. Ek is soos die ontevrede kliënt wat niks sê nie (want as ek begin praat, sterf die wag voor my mond), maar ek keer ook nooit weer terug nie.
LikeLiked by 1 person
perdebytjie said:
Beslis nommer twee en die lekkernye saamgevat en liewer vir iemand gegee het wat my waardig ag!
LikeLiked by 1 person